【台語世界/錄音】乞食hē大願——tshiau揣2018台語路

【台語世界/錄音】乞食hē大願——tshiau揣2018台語路
是按怎欲揀這篇:

Lánê新正beh--ah,新年新願望,除了ǹg望逐家平安幸福好過年,mā ǹg望台灣ê本土語言lóng thang出頭天。台語俗諺講,狗來起大厝,語言運動者舊年骨力拍拚ê成果就ká-ná起厝ê地基,今年一定ē好過!




台語文新年hē新願望,beh ǹg望lán一冬比一冬koh-khah好,tio̍h-ài檢討頂一冬有啥mih發展。Lán簡單回顧tsîng到tann本土語言復振運動ê發展(註一),kap過去來比phīng,總講--一-句,beh救本土語言若無政治手段,兩字,「穩死」!



按怎講--leh?Lán看1990年,七大縣市民進黨縣市長主辨ê「本土語言教育問題第一次學術研討會」就知,tse是第一擺官方開始leh思考「母語教育」ê問題kap實際行動。到2001年,教育部宣佈國小一禮拜ài有至少一節ê「鄉土語言(註二)」課程、2001年成立客家委員會、2003年開始討論《語言平等法》草案……跳到2017年,民進黨有影tī政策方面對搶救母語有相當ê幫贊。M̄-koh,若獨獨看台語,suah bē tín bē動,m̄知是啥mih問題?



Beh吸引koh-khah濟人──尤其是少年人──來書寫母語、實踐文字化,tsit个運動ê方向是過去民間一直leh推sak--ê。總--是,民間資源有限,運動者倚靠--ê是心內熱phut-phut ê熱情kap使命感。是講,熱情kám有法度對抗時代ê變遷、kap華語市場tshia拚?若無官方ê資源á是實際政策來相thīn,本土語言沓沓仔衰微,終其尾kan-tann是「囥tī博物館」ê運命niâ。Uì語言運動發展ê年表來看,官方對語言政策尊tshûn ê程度是本土語言活命ê mê角,ài有夠額ê資源,m̄-tsiah thang替語言ê傳播創造多元ê門路。透過媒體傳播,hōo koh-khah濟人接受本土語言,bē koh認為「講母語」是臭賤--ê,kā「學母語」tsiânn做是時行ê運動。Án-ne無形中,mā ē hōo逐家建立「語言平等」ê人權概念。



2017年,行政院已經kā《國家語言發展法》草案送到立法院、民間團體「催生台語公共電視台」得著文化部撥六千萬經費tī 2018年hōo華視beh做台語節目,ká-ná有小小ê成果,m̄-koh原住民各族語kap客語已經kōo其它法源tsiânn做「國家語言」--ah,原住民族電視台kap客家電視台mā有相關ê委員會leh支持,啊台語--leh?民進黨若準thang繼續執政,六冬內kám ē有台語委員會、台語ê國家語言地位á是台語電視台?



Lán ná乞食,驚講大心khuì,執政黨無ài撥經費,khah少huah聲beh爭取設立專責委員會,tsiah先爭取《國家語言發展法》kap台語電視台。Lán leh想,lán kám是 siunn kā家己限制--ah?Á是tshuā頭執政者無心?Lán需要探討--ê,是現實面beh按怎調整未來運動ê方向,ǹg望關心台語文ê個人、社團kap任何團體同齊思考,tshiau揣2018 ê台語路。



讀予你聽:





(作者是台文筆會會員;本文由台文筆會提供。)



註一:

1988年,客人發動「還我母語」運動。

1990年,民進黨縣市長聯盟主辦「本土語言教育問題第一次學術研討會」。

1993年,教育部宣佈beh kā母語教育用選修ê方式列入正式教學。

1996年,原住民委員會成立。

2001年,實施九年一貫課綱(包含「鄉土語言」課程);客家委員會成立,開始定期辦理客語認證。

2003年,教育部宣佈,本土語言教育是國校課程必修,一禮拜一到兩點鐘;教育部國語推行委員會提出《語言平等法》草案。

2007年,行政院文化建設委員會提出《國家語言發展法》草案。

2009年,立法院國民黨立委洪秀柱提案,kā教育部國語推行委員會ê台語認證預算總刣掉。

2011年,成大教授蔣為文hām華語作家黃春明因為對台語文kap母語教育ê立場無仝,發生衝突。

2017年3--月,文化部辦理《國家語言發展法》草案公聽會,tī 7--月提出修正--過ê草案。Tsit个法案通過了後,ē tsiânn做政府語言政策ê法源依據。

2017年5--月,《原住民族語言發展法》法定台灣原住民族各族語是「國家語言」。

2017年6--月,民間團體辦理「催生台語公共電視台」ê公聽會kap連署。

2017年10--月,彰化縣政府成立「台語文園區」籌備處(按算2018年5月初正式成立)。

2017年12--月,《客家基本法》法定台灣客家語是「國家語言」。



註二:目前稱呼ê「本土語言」,tī母語教育拄開始leh實施ê時,bat號做「鄉土語言」。



註三:本文使用教育部推薦漢字kap台羅,一寡字詞ê語音kap語意thang上教育部台灣閩南語常用詞辭典查詢。



延伸閱讀:

【台語世界/錄音】是按怎一定愛支持《國家語言發展法》?

【台語世界/錄音】三十冬ê進度

【台語世界/錄音】台語文運動新階段:做生理



若欲投稿,請寄:binpotgb@gmail.com,文章字數 600-800;文章若採用,有淡薄仔稿費。

請上【台語世界】閱讀閣較濟相關文章。


專欄屬作者個人意見,文責歸屬作者,本報提供意見交流平台,不代表本報立場